Byssusmiðir fyrri tíma á Íslandi

Fyrstu heimildir um byssusmiði á Íslandi eru frá því um miðja 18. öld.

Eitt af rannsóknarverkefnum Veiðisafnsins hefur verið gagnasöfnun og skráning heimilda þar að lútandi. Má þar m.a. nefna Drífu haglabyssur Jóns Björnssonar frá Dalvík, sem allar eru fundnar, en hann smíðaði 120 eintök. Haglabyssur frá Jóni Þorsteinssyni frá Ólafsfirði eru minna þekktar og er vinnsla enn í gangi með heimildasöfnun um hans byssusmíði.

Íslensk byssusmíði er fyrst og fremst haglabyssusmíði og er um að ræða haglabyssur frá stærðum .410 minkabyssur upp í stórar 4 ga. selabyssur, eins og þær voru oft kallaðar. Einnig hafa verið smíðaðar skammbyssur og ber að nefna byssur Eiríks Haraldssonar sérstaklega í því sambandi sem og haglabyssur Steinþórs M. Stefánssonar sem nýlega komu fram.